香港文匯報訊（記者 甘瑜）收人8,000幾萬去搞所謂「人道支援」，轉個頭洩漏受助者嘅資料出去，仲粉飾件事為「資訊保安事故」，邊個可以咁厚顏無恥？咪就係「612人道支援基金」囉！「612人道基金」明明識開記者會，但佢哋上周六起聲稱俾「黑客入侵」，洩漏咗48個受助人嘅資料後，竟然係事隔3日先喺facebook鬼鬼祟祟出個post就算，個題目就叫做「資訊保安事故報告」，真係唔小心睇漏眼就唔知原來係洩漏資料咁大鑊。有睇晒成個「報告」嘅支持者就憤怒留言︰「有48人資料外洩？有冇搞錯！你對得住我哋！」
「612人道基金」嘅語言偽術都唔講得笑，明明係洩漏「義士」資料，但係報告一開始就不斷描述佢哋嘅加密技術同保密工夫，仲講到話「每次只會摘取必須的（受助人）個人資料並以端對端加密方式傳送」。
諉過「黑客入侵」 三天後始公佈 正當大家覺得好穩陣嘅時候，原來下一段先係重點，仲要講到第四段先係事故始末。「612人道基金」話，有基金職員「操作失誤」，喺上星期六晚11點半傳電郵畀信託人嘅時候，唔小心冇移除包括受助人資料嘅附件，而信託人之一嘅陳日君個電郵咁啱得咁橋就喺咁上下時間俾「黑客入侵」，要到聽日（周一）先修正返個問題，仲要到星期四先公佈有個咁嘅問題。
咁個附件有咩呢？原來包括咗48個受助人嘅中文全名、收取支援類別（緊急經濟支援、醫療費、心理輔導費及借保釋金）同埋金額。「612人道基金」聲稱對受影響嘅人同公眾「深切致歉」，又話會「改善行政制度，加強內部訓練及監管，防止個人資料錯誤經電郵傳出」等喎。
班「義士」蒙晒面咁上陣，走投無路向「612人道基金」申請援助，點知轉個頭就俾個基金篤灰洩漏個人全名，都咪話唔灰。雖然有啲人都仲係選擇「無底線原諒」，但都有唔少人留言怒片「612人道基金」。「Chan Johnny」話︰「這樣的事情不可能有錯，你哋太大意啦！」「Au Welly」怒道︰「有48人資料外洩？有冇搞錯！你對得住我哋！」「Siu Lam Chi」質問︰「你今次洩露受助人資料，咁下次會唔會洩露捐助人資料？」
網民挖黑材料籲勿再捐款 「蔡根談」就索性「612人道基金」算賬︰「除左（咗）呢樣要道歉外，你地（哋）對被捕者嘅嚴苛挑剔都令一班原本支持『612』嘅香港人好嬲！」有網民就問有咩詳情，「Kuma Sanki」似乎反晒白眼咁話︰「『612有』幾苛刻自己google下，4千幾萬有幾多去左（咗）買音響，又有幾多係幫到『義士』，自己識計啦，十個有九個『義士』有事求救只拎到幾舊（嚿）水生活費咋，唔好下下做伸手黨，自己fc（fact check查證）啦。」佢仲明倒「612人道基金」米，叫大家唔好再捐畀佢哋，要捐就捐畀第二個組織喎。
支援「義士」計到盡 放水歐遊「手鬆」
睇「612人道支援基金」個工作簡報，雖然真係好簡約，但都學到好多嘢，例如咩叫「因果」、咩叫「同人唔同命」。「612人道基金」早前刻薄「義士」、厚待音響俾支持者鬧爆，結果9月捐款大跌，由8月籌到3,400幾萬，9月截至20號竟然只係籌到660萬唔到，呢啲咪叫因果。「義士」攞資助有冇容易到就唔知，但基金上月底出post割席，叫人「請勿再聯絡基金要求資助裝備」，但同月就資助「香港大專學界國際事務代表團」喺倫敦、日內瓦嘅交通膳食，「民陣」同「民權觀察」預支埋10月嘅費用，連同9月攞咗基金超過28萬，呢啲咪叫「同人唔同命」。
買音響做臭朵 捐款跌逾千萬想睇「612人道基金」個報告都唔係咁易，事關你去佢個網站搵工作簡報，佢會指咗你去睇佢8月頭喺fb出嘅一個post，真正嘅工作簡報就要自己喺最新消息嗰度慢慢搵。
搵得咁辛苦，當然要睇真啲。望吓佢哋盤 數，繼 8月俾人鬧完個基金「關心音響多過 『義士』」、「買音響易claim（報銷）過醫藥費」後，9月份佢哋嘅捐款就全線大跌。喺10萬蚊以下嘅捐款方面，7月6號至31號有近2,200萬，8月亦有近3,300萬，但9月更新到20號，竟然只得660萬唔到；大額捐款方面，7月有110萬，8月有120萬，9月竟然係「暫無」，真係「生意慘淡」。
拒批錢買裝備 援外遊包膳食唔知係咪因為收入少咗，「612人道基金」喺9月28日就出咗個post，叫啲人「請勿再聯絡基金要求資助裝備」，擺明就係率先割席。佢哋話︰「購買裝備或生活費並不是基金人道支援的範圍。」唔怪得之啲「義士」搲極都冇錢啦。「612人道基金」仲聲言，佢哋唔係支援運動嘅「抗爭基金」，只係要為所謂「反送中運動」中受傷同被捕嘅人提供「人道支援」。
講到咁樣，當然又要再望下佢盤數。喺9月20日更新嘅工作報告入面，新增嘅仲有「香港大專學界國際事務代表團」去倫敦、日內瓦「海外游說」嘅「交通膳食」費用，唔知係咪驚餓親佢哋好唔人道呢？
「民權觀察」兩個月狂執18萬再睇吓「民陣」，原來佢哋仲預支埋10月嘅錢，佢哋個「24小時被捕支援熱線」9 月、10月攞到10萬蚊資助；「民權觀察」個「24小時被捕支援熱線」同律師團隊秘書處9月、10月都攞到超過18萬資助。
我諗唔少人睇完都好心傷，咁樣又算唔算係「反送中運動」中受傷嘅人呢？唔知有冇得claim呢？
